Gara di Cores a Ridnaun

L schipas fova de carton y canche Samuel, un di dirighënc dl Cor di Jëuni Gherdëina y nosc sciafer per chël di, ie jit a tò i schipasc, àl damanda sce i ne ëssa pa nia i gumies da i taché. Chisc ti à dit che chëi ne ài bele da diesc ani nia plu. Rijan ti à dit Samuel: “Da nëus ne n’iel chisc schipasc bele da diesc ani nia plu!” Per tan scëmpl che l purtoi nes savova, fòvel batù drët bën. Pieda via ie la garejeda cun la luesa, ulache ne on nia fat pea. Tla categuries di schi fans bën reprejentei dai jëuni. Te una na categuria à nosc mutons, nasciui tl 1988 y plu jëuni, pudù se la fé ora danter ëi. Duc nosc cumëmbri ie unic jù bën y à fat n bon resultat. Do la garejeda ons pudù se senté adum tla sala di cungresc a Ridnaun pra na bona marënda; y per la fé plu nteressanta nes ài fat aspité nchin la cinch cun la premiazion. Ma pra nosta mëisa fòvel for da rì y danter batudes y matades, ciaculamënt y i cëiresc sun mëisa, cun chëi che fajan esperimënc mac, ne fòvel mei da stufé.

De bon resultac di jëuni
Pra la premiazion nes tucòvela riesc do la lueses a nëus, ajache i scumenciova cun i plu jëuni. Pra la mutans dal 1988 y plu jëunes à Milena Perathoner da Praplan venciù la bedaia de bront cun n tëmp de 44.33, Elena Mussner da Ruacia cun n tëmp de 37.64 à monce pudù zapé sun l scialier plu aut dl palch. Pra i mutons ie ju l plu debota Diego Moroder da Resciesa cun n tëmp de 42.58, ruvan cuarto, Armin Grasberger ie ruvà terzo, Matthias Runggaldier da Lampezan ie ruvà segondo, y suinsom ie ruvà l jëunn Aron Runggaldier d’Aldos cun n tëmp de 36.21. Mario Demez ie frit ora, plu dessegur ajache l ova massa n gran sgors a pië via.

Miëur tëmp dl di
Tla categuria dal 1978 al 1987 se à fat unëur la surans da Iman. Ingrid Demetz ie ruveda cuarta cun n tëmp de 43.85, Julia Demetz terza, cun n tëmp de 42.73.Da auzé ora ie la boniscima garejedes de Aron y de Elena che à giapà na bela copa prun, ajache i à fat l miëur tëmp dl di.

La miëura scuadra
Nchin a chësc pont savans bele i resultac danora. Ma se ncunfertan da bestia sun l resultat dut adum de duc i cores. L univa cumpedà adum i trëi miëures tëmps dl di. Cherdei ora univa i cores da lajù su, chël uel dì che i miëures univa cherdei su ala fin. Nëus duc drucan dassënn i polesc y canche l ie unì cherdà su l cor che ova fat l segondo tëmp, y l Cor di Jëuni Gherdëina ne fova mo nia unì numinà, auzans bele i braces per fé n bel gran tifo, ajache savan che fan jic l plu debota de duc. On venciù n bel cëst cun de bon ciociul y d’autra gulusaries!Da dedò fòvel mo na bela lotaria, ulache uni partezipant à giapà n pitl pest. Gën assans abù l graton che fova da vëncer, ulache assan metù ite la copes y i pesć, sciche danter l auter chëla bela gran Schinkenwurst, per fé pona na bela foto. Ma fan sambën nce cuntënc de se n jì cun chël che an venciù sot a n brac mpede te graton, ajache ala fin se ëssel bele mé mpaià a fé pea per l rijamënt che on fat dut l di! Speron che chësta blòta garejeda unirà nce a se l de n auter ann, ulache fajeron sambën inò gën pea!

Ingrid Demetz

Back to gallery