De fauré dl 2022 ie stat lità n nuef cunsëi y n nuef presidënt. Cun nueva ideies y scialdi creatività cielen de realisé nuef projec tl 2022. Martin Demetz ie l presidënt nuef. L jëunn de 22 ani de Urtijëi ie tl cunsëi per l prim iede, diretamënter da presidënt. Ti cialon ala lia n generel y al cunsëi nuef L Cor di Jëuni de Urtijëi ie nasciù tl 1994 da Guido Perathoner, caplan dl luech da ntlëura. Martin Demetz ie nasciù tl 1999, l ie pra l cor bele da set ani incà, ma chësc ie si prim iede tl cunsëi.
Sentimënt de recunescënza
"É bën bele n generel for mpue abù l nteres de ulëi jì tl cunsëi. Śën che son tl lëur de finé mi bachelor de CGI ("computer-generated imagery", imajes fates cun l computer, ndr.) a Nürnberg, me sënti che l ie ëura de ti dé de reviers zeche deplù al cor," nscila Martin Demetz.
L cunsëi nuef
Cun l presidënt nuef, iel nce n cunsëi nuef, metù adum da: Tanja Comploj, Laura Stuffer y Linda Rungger (trëi dirighëntes), Valeria Bernardi (magasiniera), Ines Perathoner (che se cruzia dla notes), Sofia Tomada (scrivana) y Elena Rumerio (cassiera).
La presidënta da dant, Anna Senoner, à lascià si ncëria do cater ani.
La proes va inò inant
Do n doi mënsc te chëi n à messù se fermé, àn śën inò pudù scumencé cun la proes. Chëstes vën fates n iede al'ena, de sada, per abiné n mumënt te chël che dutes y duc ebe dl'aurela, danter chi che va a scola, tl'università y chi che lëura.
La pert zentrela: cumenanza y cumpanìa
L presidënt nuef Martin Demetz rejona dla pert plu mpurtanta dla lia, dl cor: "La ne va nia de savëi da cianté bën, ma dla cumenanza, de sté deberieda y avëi na hez."
Demetz nstës ova scumencià, dan set ani, mpue per cajo: "Tl prim me ova trat ite mpue i cumpanies, y pona me àl sapù propi scialdi bel."
L'età dla ciantarines y di ciantarins va dai 14 nchin ai 26 ani, y al mumënt n iel n 25. Danz che l ie al mumënt mé puec mutons, y l presidënt Demetz tol la ucajion nce tres La Usc per nvië nce i mutons a se fé inant.
Na prima esperienza per chi che uel cianté
L presidënt Demetz rejona mpo de n bon livel, a pensé che l ne se trata pu nia de n cor prufesciunt. Martin Demetz: "Do la scola mesana, sce zachei uel scumencé a cianté, pona ie l prim cuntat chël cun n cor di jëuni."
Mujiga d'uni sort
Tl cor vëniel ciantà dantaldut mujiga sacrela, ma pona nce truepa mujiga moderna, pop, coche mé per dì coversi di Pentatonix o di Coldplay. Tresora vëniel mparà ite cianties nueves. La ucajions per na performance possa vester de plu: l Marcià da Nadel, na mëssa o gor na noza.
N mesun per mparé a cunëscer miec chësta realtà, ie nce la plata online dla lia, che ie unida fata da nuef propi ntan chisc dis.

Bruno Maruca - La Usc
Edizion n. 08 dl 25.02.2022