“Gesamttiroler Wertungssingen” a Dispruch

Am 6. Gesamttiroler Wertungssingen am 12./13. November 2016 in der Musikschule Innsbruck nahmen 36 Chöre teil; davon kamen 14 aus Südtirol.

 

L Cor di Jëuni Ghërdeina dal “Gesamttiroler Wertungssingen” a Dispruch

N sada ai 12 y ai 13 de novëmber fova a Dispruch na manifestazion che ven metuda a ji uni trëi ani ulache cores da dut l Tirol possa cianté dan na giuria metuda adum da de plu dirighënc cunesciui a livel nternazionel. L fin ie chël de se prejenté per giaté na valutazion y na critica costrutiva per pudei miuré la cualitá dl cianté dl cor.

Danter plu categuries che n pudova cri ora se à l Cor di Jëuni Gherdëina scrit ite tla categuria “Cor mescedá” purtan dant pec dl livel C (literatura plu ria. Una na ciantia fova de ublianza y l autres pudova uni cor se cri ora nstës.
L Cor di Jëuni fova n raport ai autri bendebo n gran cor y ne ova belau nia lerch sun paladina. L pez de ublianza fova “Cantate domino” de Miŝkinis Vytautas, che fova danterauter nce n cumëmber dla giuria, pona “Magnificat” Andrea Gabrieli, la ciantia ladina “Do l tëmp” de Stefan Demetz y nce tlo n spiritual “The Battle of Jericho” arrangiá da Moses Hogan. L'acustica fova dassen suta tl Ursulinensaal dla scola de mujiga de Dispruch ma puremò fova l dirighënt Samuel Runggaldier dret cuntënt de coche la fova jita.
Do avëi ciantá jiva n giuror cun uni cor te n autra sala ulache l ti dajova reisc n “feedback”. 
Sautá ora iel che ti ova dassen plajú coche fova metú adum l program dla cianties. L bel sonn dl cor, la ntunazion, la dinamica, la prejenza sun paladina fova dut ponc che univa teuc n cunscidrazion y che ie ënghe unìi laudei.
Da la 6 fovela po tan inant che univa cunedides la valutazions ufizieles per uni cor. L Cor di Jëuni Gherdëina a giapá te si categuria la valutazion “ezelënt”. La legrëza y l la sodisfazion fova sambën dassënn granda.
Per stlu jú a puntin chesc bel fin dl ena de mujiga iel uni ciantá y bala cun i giurores, daterauter à l Cor di Jëuni Gherdëina deberieda a autri ciantarins de autri cores abú l unëur de pudei ciante la ciantia “Cantate domino” sota la bachëta de l componist i giuror Miŝkinis Vytautas.

 

Ingrid Demetz
Isabella Mussner

Sëlva, 03.12.2016

Back to home